भरतपुर महानगरपालिकाद्वारा ८ वटा सामुदायिक विद्यालयमा खेल प्रशिक्षक नियुक्त

भरतपुर । भरतपुर महानगरपालिकाले ८ वटा सामुदायिक विद्यालयमा खेल प्रशिक्षक नियुक्त गरेको छ ।

महानगरमा एक कार्यक्रमका बीच महानगर प्रमुख रेनु दाहालले नियुक्ति पत्र प्रदान गर्नुभएको छ ।

खेलकुदको हब बन्दै गइरहेको भरतपुर महानगरपालिकाले पहिलो चरणमा विभिन्न खेलका प्रशिक्षक नियुक्ति गरेको हो ।

प्रमुख दाहालले भरतपुरमा खेल पूर्वाधारहरु बन्ने क्रम बढिरहेकाले दक्ष खेलाडी उत्पादन गर्ने कार्यलाई महानगरले जोड दिएको बताउनुभयो । प्रशिक्षकले जिम्मेवार ढङ्गबाट खेल गतिविधिलाई अगाडि बढाउन शुभकामना पनि दिनुभयो ।
भरतपुर महानगरले एक वडा एक खेल प्रशिक्षकको नीति पनि लिएको छ ।

प्रभात मावि, दुर्गा शेषकान्त मावि, हिमालय दण्डपाणि मावि, जानकी मावि मेघौली, अन्नपूर्ण मावि, राष्ट्रिय मावि कृष्णपुर, बालकुमारी मावि र नारायणी नमुना माविमा खेल प्रशिक्षक नियुक्त भएका हुन् ।

प्रशिक्षकहरुले भलिबल, फुटबल, क्रिकेट, तेक्वान्दो, कँराते, कबड्डी, पारा तेक्वान्दो र पारा एथ्लेटिक्सको विद्यार्थीलाई प्रशिक्षण दिने छन् ।