चितवन,१६ चैत । नेपालकै पहिलो निकुञ्ज चितवन राष्ट्रिय निकुञ्ज क्षेत्रभित्र लाग्ने एक मात्र विक्रम बाबा मेला चैत २७ गतेदेखि सुरु हुने भएको छ । चैतेदशैंलाई लक्षित गरी हरेक बर्ष चैत्र औंसीदेखि पूणिर्मासम्म मेला लाग्ने गर्दछ । मेला १५ दिनसम्म चल्ने भरतपुर महानगरपालिका वडा न. २३ का वडाध्यक्ष दिपक दवाडीले जानकारी दिए ।
विक्रम बाबामा दर्शन गर्नाले सन्तान प्राप्ती, सुख लगायत मनोकांक्षा पुरा हुने विश्वास गरिन्छ । चैते दशैंमा हजारौ भक्तजनले विक्रम बाबा दर्शन गर्ने र पशु पंक्षी वली दिने गर्दछन् ।
विक्रम बाबाको पूजा परापूर्व कालदेखि थारु जातिले गर्ने भएपनि पछिल्लो समय अन्य जातजातीहरुको पनि यसमा आस्था बढेको देखिन्छ ।
किम्बदन्तीका अनुसार विक्रम नाम गरेको आदीबासी (गुरौ) बाघको आक्रमणबाट ज्यान गएको ठाउमा पुजा गरे भाकल पूरा हुने, परिवारमा शान्ति, सन्तान प्राप्ति, मनोकामना पूरा हुने विश्वास छ ।
बिश्व सम्पदा सूचीमा सूचीकृत चितवन राष्ट्रिय निकुञ्ज भित्रका आकर्षक पर्यटकीय स्थल तथा बन्यजन्तुहरुको अवलोकन गर्न समेत सकिने हुदा मेला भर्न आउनेहरुको संख्या बढ्दै गइरहेको छ। छिमेकी मुलुक भारतबाट समेत बिक्रम बाबा दर्शनका लागि भक्तजन आउने गर्छन् ।
Discussion about this post