प्रधानमन्त्री प्रचण्ड र डा. बाबुरामबीच भेटवार्ता

काठमाडौं,१ असार । प्रधानमन्त्री पुष्पकमल दाहाल ‘प्रचण्ड’ र नेपाल समाजवादी पार्टीका अध्यक्ष डा. बाबुराम भट्टराईबीच भेटवार्ता भएको छ ।

समाजवादी मोर्चा घोषणा गर्ने तयारीमा रहेका प्रधानमन्त्री प्रचण्ड र नेता भट्टराईबीच शुक्रबार बिहान बालुवाटारमा भेटवार्ता भएको हो ।

भट्टराई आफूलाई उपेक्षा गरेको भन्दै गोरखा पुगेर संगठन विस्तारमा लागेका थिए । तर, शुक्रबार बिहान बालुवाटार पुगेर उनले प्रचण्डसँग भेट गरेका हुन् ।

भेटमा प्रधानमन्त्रीको भारत भ्रमण, संघीय बजेट, टीआरसीलगायत शान्तिप्रकृयाका बाँकी कार्यभार, प्रस्तावित समाजवादी मोर्चा लगायतका विविध विषयमा छलफल भएको भट्टराईले बताएका छन् ।

बाहिर चलेका हल्लाको पछि नलाग्न आग्रह गर्दै उनले सामाजिक सञ्जालमार्फत प्रचण्डसँगको भेटमा नयाँ समझादी बनेको समेत बताएका छन् । ‘विचार, नीति, कार्यक्रम, संगठनात्मक विधिलगायतका विषयमा सम्भव सबै पक्षबीच गम्भीर छलफल गर्दै अघि बढ्ने समझदारी भएको छ,’ उनले भनेका छन् ।