आज विश्व रक्तदाता दिवस मनाइँदै

काठमाडौं,३१ जेठ । विश्व रक्तदाता दिवस आज नेपालमा पनि विभिन्न सचेतनामूलक कार्यक्रम गरी मनाइँदैछ ।हरेक वर्षको जुन १४ का दिन विश्वभरका देशले विश्व रक्तदाता दिवस मनाउने गर्छन् । यस दिवसमा सुरक्षित रगत र रगत उत्पादनको आवश्यकताबारेमा सचेतना जगाउन र रक्तदान गर्न प्रेरित गर्दै आइएको छ ।

यस वर्ष ‘नियमितरुपमा रगत तथा प्लाज्मा दान गरौँ, जीवन बचाउने कार्यमा हातेमालो गरौँ’ भन्ने नाराका साथ विश्व रक्तदाता दिवस मनाइँदै छ । नाराले जीवनपर्यन्त रगतको आवश्यक पर्ने बिरामीलाई रगत र प्लाज्मा दान गरेर सहयोग गर्न हरेक व्यक्तिले खेल्ने भूमिकाको महत्वलाई दर्शाएको छ ।यसले नियमित रूपमा रगत र प्लाज्माको दानमार्फत दीगो र सुरक्षित आपूर्तिको महत्त्वबारे समेत चर्चा गरेको छ । यही अवसरमा देशभरका विभिन्न संघसंस्था र अस्पतालले रक्तदानसम्बन्धी जनचेतना फैलाउने, दातालाई प्रोत्साहन गर्ने र रक्तदानको कार्यक्रम आयोजना गरेका छन् ।

यस दिवसका अवसरमा ब्लड डोनर्श एशोसिएशन नेपालले विभिन्न कार्यक्रमको आयोजना गर्दै आएको छ । एशोसिएशनले साताव्यापी चेतनामूलक कार्यक्रमको आयोजना गरिरहेको एशोसिएशनका महासचिव केशव मर्हजनले जानकारी दिए ।