चितवन,२७ जेठ । जिल्ला कारागारमा छालाको समस्याका बिरामीको सङ्ख्या बढ्दै गएको छ । गर्मी बढेसँगै यो समस्या बढ्दै गएको हो । कार्यालयका सिनियर हेल्थ असिस्टेन्ट लेखनाथ पौडेलका अनुसार कारागारमा रहेका कैदीबन्दीमध्ये तीन सय जनामा छालाको रोगको समस्या देखिएको हो । बसाईं साँघुरो हुँदा पसिनाका कारण दाद, पिलोलगायतका समस्या देखिएको उहाँले बताउनुभयो ।
विगत १५ दिनदेखि यो समस्या बढ्दै गएको उहाँले जानकारी दिनुभयो । उहाँले भन्नुभयो, “यो समस्या अझै फैलनसक्ने देखिन्छ ।” गर्मी बढेसँगै छाला र झाडापखालाको समस्यासमेत देखिएको उहाँले बताउनुभयो ।
अहिले २५ जनामा झाडापखालाको समस्या देखिएको उहाँले जानकारी दिनुभयो । यसलाई रोकथामका लागि कारागार प्रशासनले आन्तरिक व्यवस्थापनको काम गरिरहेको उहाँले भनाइ छ ।
कारागारमा सात सय ४० कैदीबन्दी रहेका छन् । दुई सय ५५ जनाको क्षमता रहेको पुरुष बन्दी गृहमा छ सय ९३ र २५ जनाको क्षमता रहेको महिला बन्दी गृहमा ४७ जना कैदीबन्दी छन् । तीसँगै आश्रित बालबालिका चार जना रहेको कार्यालयका प्रमुख कमलप्रसाद आचार्यले बताउनुभयो ।
![Khabar_Chitwan[1]](https://khabarchitwan.com/wp-content/uploads/elementor/thumbs/Khabar_Chitwan1-q32yg33ry1w93hxhgrek6ezhfe8djapkiva3mjsb32.png "Khabar_Chitwan[1]")
Discussion about this post