भरतपुर महानगरपालिकाभित्रका विद्यालय थप चार दिन बिदा

चितवन,२६ जेठ । दिनदिनै गर्मी बढ्दै गएपछि भरतपुर महानगरपालिकाभित्रका विद्यालयमा थप चार दिन बिदा दिइएको छ । महानगरको शैक्षिक प्रशासन महाशाखाले आज (शुक्रबार) एक सूचना जारी गरी जेठ ३० गतेसम्म बिदा दिने निर्णय भएको जनाएको हो ।

महानगरले यस अघि जेठ २१ गतेदेखि २६ गतेसम्म बिदा दिएको थियो । गर्मी निरन्तर बढ्दै गएकाले थप चार दिन बिदा दिने निर्णय भएको सूचनामा जनाइएको छ ।

नगर शिक्षा अधिकारी महेन्द्रप्रसाद पौड्यालद्वारा हस्ताक्षरित सूचनामा भनिएको छ‚ ‘बिदाको समयमा बालबालिकालाई दिउँसो घाममा हिँड्डुल गर्न नदिने र नदी पोखरीमा पौडी खेल्ने, माछा मार्नेजस्ता कार्यमा संलग्न हुन नदिन आवश्यक सावधानी अपनाउनुहोला ।’