इच्छाकामना गाउँपालिकाद्वारा गर्भवती महिलालाई अण्डा र क्याल्सियम चक्की वितरण

चितवन,२४ जेठ । चितवनको इच्छाकामना गाउँपालिकाले गाउँपालिका भित्रका गर्भवती महिलाहरुलाई अण्डा र क्याल्सियम चक्की वितरण गरेको छ । गाउँपालिकाले मंगलबार गाउँपालिकाका सबै स्वास्थ्य संस्थाहरु मार्फत गर्भवती महिलाहरुलाई पोषण सुधार कार्यक्रम अन्तर्गत उक्त सामाग्री वितरण गरेको हो ।

गाउँपालिकाको चालु आर्थिक वर्ष २०७९।८० को निति तथा कार्यक्रममा गर्भबती महिला को लागि पोषण सुधारको लागि अण्डा र क्याल्सियम चक्की वितरण गर्ने भनी ५ लाख रुपैयाँ बजेट विनियोजन गरिएको थियो । सोही रकमबाटै गर्भवती महिलाहरुलाई अण्डा र क्याल्सियम चक्की वितरण गर्न थालिएको गाउँपालिकाका उपाध्यक्ष माया सिलवालले जानकारी दिए । उनका अनुसार यो कार्यक्रमलाई गाउँपालिकाले आगामी वर्ष पनि निरन्तरता दिनेछ ।

उक्त सामाग्री गाउँपालिका उपाध्यक्ष माया सिलवाल, प्रमुख प्रशासकीय अधिकृत जगतप्रसाद भुसाल, वडा नं. ४ का वडाध्यक्ष रुद्रप्रसाद उप्रेती लगायतको रोहवरमा वितरण गरिएको गाउँपालिकाका स्वास्थ्य शाखाका सहायक प्रमख हरि देवकोटाले जानकारी दिए । उनका अनुसार १ जना गर्भवती महिलालाई १ क्रेट अण्डा वितरण गरिएको थियो भने आवश्यकता अनुसार क्याल्सियम चक्की दिईएको थियो ।