माडी बाँदरमुढे घटनाको १८ वर्ष पुरा,पीडितको पीडा अझै उस्तै

माडी,२३ जेठ । चितवनको दक्षिण माडी बाँदरमुढे मा तत्कालीन माओवादीले यात्रु बसमा गराएको विष्फोटको घटना भएको १८ बर्ष पुगेको छ ।

तत्कालीन विद्रोही नेकपा (माओवादी)द्वारा सञ्चालित जनयुद्धको समयमा माडीको बाँदरमुढे खोलामा यात्रुबाहक बसलाई निशानामा राखेर गरेको विस्फोट ‘बाँदरमुढे घटना’ का रूपमा चर्चित छ ।

वि.सं. २०६२ साल जेठ २३ गते चितवन माडीमा यात्रुहरु बोकेर गुडिरहेको यात्रुबाहक बस विस्फोटमा पर्दा घटनास्थलमै ३८ जनाको ज्यान गएको थियो भने ७५ जना घाइते भएका थिए । घटनामा घाइते भएका थप ४ जनाको समयक्रममा मृत्यु भइसकेको छ ।

अयोध्यापुरीबाट यात्रु लिएर नारायणगढ आउँदै गरेको ना २ ख ३२४५ नम्बरको बसमा माओवादीले बम विस्फोट गराएका थिए । घटनामा अघिकाँस माडीकै सर्वसाधारण परेका थिए । घटनापश्चात् पीडितको राहतका लागि विभिन्न समयमा बोलिएका आश्वासन पूरा नहुँदा घटनाका पीडितहरु थप पीडित बन्दै गएका छन् ।

तत्कालीन नेकपा (माओवादी)का अध्यक्ष एवं हालका प्रधानमन्त्री पुष्पकमल दाहाल प्रचण्डले पीडित पक्षसंग गरेको सहमती पूणर्रुपमा लागु हुन सकेको छैन । २०७४ मंसिर १७ गते भएको सहमतीमा मृतकका आश्रित परिवारका काम गर्न सक्नेलाई रोजगार, काम गर्न नसक्नेलाई जीवनवृत्ती र बालबालिकालाई निःशुल्क शिक्षा दिने लगायतका सहमती भएको थियो ।

यसैबिच,घटनामा ज्यान गुमाएकाहरुको सम्झनामा बाँदरमुढे स्मारक स्थलमा बाँदरमुढे घटना पीडित समितिको आयोजनामा स्मृति सभा कार्यक्रम सञ्चालन हुँदैछ ।