प्रतिनिधि सभा र राष्ट्रिय सभाको बैठक बस्दै,एमालेले विरोध गर्ने 

काठमाडौं,२१ जेठ । प्रतिनिधि सभा र राष्ट्रिय सभाको बैठक आज बस्दैछ । प्रतिनिधि सभाको बैठक बिहान ११ बजे र राष्ट्रिय सभाको  बैठक दिउँसो १ बजेर १ मिनेटमा बस्दैछ । संघीय संसदका दुवै सदनमा आजदेखि सरकारको वार्षिक बजेटमाथि छलफल हुँदैछ ।

बैठकमा अर्थमन्त्री डा. प्रकाशशरण महतले वक्तव्यसहित आर्थिक वर्ष २०८०–०८१ को राजस्व र व्ययको वार्षिक अनुमान (बजेट) माथि सामान्य छलफल प्रारम्भ गरियोस्’ भनी प्रस्ताव प्रस्तुत गर्नेछन् ।त्यसपछि बजेटमाथि छलफल शुरु हुने सम्भावित कार्यसूची रहेको संसद् सचिवालयले जनाएको छ ।

संवैधानिक व्यवस्थाबमोजिम यही जेठ १५ गते अर्थमन्त्री डा. प्रकाशशरण महतले संसद्मा बजेट पेस गरेका थिए ।

एमालेले विरोध गर्ने 
प्रमुख प्रतिपक्ष दल नेकपा एमालेले भने बजेटको विरोध गर्ने नीति बनाएको छ । जसरी नीति तथा कार्यक्रममाथि विरोध गरेको थियो त्यसरी नै बजेटमाथि पनि एमालेले विरोध गर्ने भएको छ । सांसदहरुले खरो प्रतिपक्षको भूमिका अब देखिने भनी घुर्कीसमेत दिइरहेका छन् ।

राष्ट्रिय स्वतन्त्र पार्टी रास्वपाले रचनात्मक प्रतिपक्षको भूमिका खेल्ने बताएको छ भने राप्रपाका सांसदहरु भने बजेटमा विभाजित छन् । प्रमुख सचेतक ज्ञानबहादुर शाहीले बजेट राम्रो आएको प्रतिक्रिया दिएका छन् भने अध्यक्ष राजेन्द्र लिङ्देनले समर्थन गर्ने कुनै आधार नभएको बताएका छन् ।