नारायणी किनारका अवैध संरचना भरतपुर महानगरद्वारा भत्काउन सुरु

भरतपुर,१८ जेठ । नारायणी नदीकिनारमा निर्माण गरिएका अवैध संरचनाहरु घरधनीले स्वस्फूर्तरुपमा आफै भत्काउन सुरु गरेका छन् । नदीकिनारमा अवैध ढंगबाट निर्माण गरिएका घरहरुमा भरतपुर महानगरपालिकाले (आज) बिहीबारबाट डोजर चलाउने भएपछि नारायणी नदीकिनार पुग्दा त्यहाँको वातावरण निकै फरक देखिन पुग्यो ।

घर धनीहरु आफै महानगरको यो अभियानलाई थप सहयोग गर्ने भन्दै खुसीसाथ आफ्नो घर आफै भत्काइ रहेको दृश्य देखियो ।भरतपुर महानगर प्रमुख रेनु दहाल, उपप्रमुख चित्रसेन अधिकारी, प्रमुख प्रशासकीय अधिकृत नरेन्द्रकुमार राना, वडा नं १ का अध्यक्ष केशव महर्जन, वडा नं ३ का अध्यक्ष विकास थापा, ४ का अध्यक्ष अर्पण पोख्रेल, १० का अध्यक्ष परमेश्वर खनाल, कार्यपालिका सदस्य विष्णु भुजेल र पत्रकारहरुसहितको टोली नारायणी नदीकिनार पुग्दा त्यहाँका घरधनीहरु महानगरको अभियानलाई सफल बनाउन आफै घर भत्काइरहेका थिए ।

महानगरले नारायणी नदीकिनारका अवैध संरचना भत्काउने भएपछि समृद्ध र सुसंस्कृत महानगरको परिकल्पनालाई साकार पार्न भन्दै स्थानीयले अवैध संरचना आफै भत्काउन सुरु गरेपछि महानगरपालिकाले खुसी व्यक्त गरेको छ ।

महानगर उपप्रमुख चित्रसेन अधिकारीले भने– ‘महानगरको अभिायनलाई सफल पार्न स्थानीयले मनैदेखि सहयोग गर्नु सकारात्मक छ, यसबाट अन्य वडाका बासिन्दाले पनि पाठ सिक्नुपर्छ ।’

अवैध संरचना हटाउने महानगरको अभियानको निरीक्षण गरेकी महानगर प्रमुख रेनु दाहालले भनिन् – ‘महानगरपालिकाभित्रका सार्वजनिक जग्गा संरक्षण गर्न वडा नं १ बाट काम थालनी गरिएको छ, अभियानको सुरुआतमै घरधनी आफैले भत्काएर राम्रो उदाहारण पेस गर्नुभएको छ, संरचना बनाउनेले आफै नहटाए मात्र बल प्रयोग गर्ने महानगरको नीति छ ।’