काठमाडौं,१३ जेठ । बागमती प्रदेश सरकारले ३ दिन गणतन्त्र दिवस मनाउने भएको छ । आन्तरिक मामिला तथा कानून मन्त्री गङ्गानारायण श्रेष्ठले शुक्रबार(आज) पत्रकार सम्मेलनमार्फत जेठ १४ गते(भोलि) देखि १६ गतेसम्म विभिन्न कार्यक्रम आयोजना गर्ने जानकारी दिए ।
जेठ १४ गते बृहत् रक्तदान कार्यक्रम गर्ने, १५ गते बिहान हेटौँडाको बुद्धचोकबाट मुख्यमन्त्री तथा मन्त्रिपरिषद्को कार्यालयको प्राङ्गणसम्म प्रभातफेरि आयोजना गर्ने, मुख्यमन्त्री तथा मन्त्रिपरिषद्को कार्यालयको प्राङ्गणमा गणतन्त्र दिवस, २०८० विशेष समारोहमा प्रदेश प्रमुखबाट सम्बोधन हुने कार्यक्रम रहेको छ ।
सोही दिन साँझ प्रदेशस्थित सबै मन्त्रालय, कार्यालय, सार्वजनिक एवं सामुदायिक सङ्घसंस्था, शैक्षिक प्रतिष्ठान तथा निकाय र प्रदेशवासीका घरघरमा दीपावली गर्ने उनले बताए ।
मन्त्री श्रेष्ठका अनुसार जेठ १६ गते वृक्षरोपण कार्यक्रम आयोजना गर्ने मन्त्रालयअन्तर्गतका कार्यालय र सार्वजनिक स्थानको सरसफाइ गर्ने, सार्वजनिक निकायले राष्ट्रिय झण्डा फहराउने एवं ब्यानर प्रदर्शन गर्ने, सञ्चार माध्यममार्फत गणतन्त्र दिवसलाई सभ्य र भव्यरूपमा मनाउन अपिल गर्ने, प्रदेशमा क्रियाशील पत्रकारलाई प्रोत्साहित गर्न विभिन्न विधामा स्थापित पत्रकारिता पुरस्कार वितरण गर्ने जस्ता कार्यक्रम तय भएको छ ।
Discussion about this post