इण्डियन प्रिमियर लिग : मुम्बईलाई हराउँदै गुजरात फाइनलमा

काठमाण्डाै,१३ जेठ । इण्डियन प्रिमियर लिग (आइपिएल)मा मुम्बई इण्डियन्सलाई ६२ रनले हराउँदै गुजरात फाइनलमा प्रवेश गरेको छ । गएराति सम्पन्न दोस्रो क्वालिफायर खेलमा मुम्बई इण्डियन्सलाई हराउँदै गुजरात फाइनलमा प्रवेश गरेको हो ।

नरेन्द्र मोदी क्रिकेट मैदान अहमदाबादमा टस हारेर ब्याटिङको निम्तो पाएको घरेलु टोली गुजरातले निर्धारित २० ओभरमा ३ विकेट गुमाएर २ सय ३३ रन बनाएको थियो ।उसका लागि शुभन गिलले शतकीय पारी खेले । ६० बलको सामना गरेका उनले १० छक्का र ७ चौकासहित १ सय २९ रन बनाए ।यस्तै, साई सुदर्शनले ४३, हार्दिक पाण्ड्याले अविजित २८ र ऋद्धिमान साहले १८ रनको योगदान दिए । मुम्बईका लागि पियुष चावला र आकाश माधवालले १/१ विकेट लिए ।

गुजरातले दिएको २ सय ३४ रनको लक्ष्य पछ्याएको मुम्बई १८ दशमलब २ ओभरमा अलआउट भयो । उसले १ सय ७१ रन मात्र बनायो। उसका लागि सूर्यकुमार यादवले ७ चौका र २ छक्कासहित सर्वाधिक ६१ रन बनाए । यस्तै, तिलक वर्माले ४३ र क्यामरुन ग्रीनले ३० रन जोडे । बाँकी ब्याटरले भने दोहोरो अंकमा समेत रन बनाउन सकेनन् ।गुजरातका लागि मोहित शर्माले ५ विकेट लिए । यस्तै, मोहम्मद शामी, राशिद खानले २/२ र जोस लिटलले १ विकेट हात पारे ।

अब उसले उपाधिका लागि आइतबार चेन्नई सुपर किंग्सको सामना गर्नेछ । चेन्नईले पहिलो क्वालिफायरमा गुजरातलाई हराउँदै फाइनलको यात्रा तय गरेको थियो ।