रेशम चौधरीलाई गणतन्त्र दिवसमा छुटाउने तयारी,आममाफी दिने प्रक्रिया सुरु

काठमाडौं,१२ जेठ । टिकापुर नरसंहारमा दोषी ठहरिएर जेल सजाय भोगिरहेका रेशम चौधरीलाई आम माफी दिने प्रक्रिया सरकारले अघि बढाएको छ।गणतन्त्र दिवसको अवसर पारेर राष्ट्रपतिबाट उनलाई माफी दिने तयारी भएको हो ।

सर्वोच्चले जेठ २ गते मात्रै जिल्ला र उच्च अदालतबाट भएको जन्मकैदको फैसला सदर गरेको भए पनि सरकारले जेठ १५ गते गणतन्त्र दिवसका अवसर पारेर चौधरीलाई आममाफी दिने प्रक्रिया अघि बढाएको गृह मन्त्रालय स्रोतले जानकारी दिएको छ ।

चौधरी २०७४ फागुन १५ देखि थुनामा छन् । उनलाई सजाय माफी दिने विषयमा प्रधानमन्त्री पुष्पकमल दाहाल ‘प्रचण्ड’ले राष्ट्रपति रामचन्द्र पौडेलसँग छलफल गरेका छन् ।

कैलाली जिल्ला अदालतले उनलाई २०९४ साल फागुन १३ गतेसम्म जेल सजाय सुनाएको थियो। उक्त आदेश उच्च र सर्वोच्च अदालतबाट समेत सदर भएको अवस्थामा उनी अझै १४ वर्ष जेल बस्नुपर्ने भए पनि सरकारले गणतन्त्र दिवसका अवसरमा माफी दिन लागेको हो।

चौधरीलाई जेलमुक्त गर्न सरकारले पटक पटक प्रयास गर्दै आएको छ। गत मंसिरमा प्रचलित कानुनलाई तोडमोड गर्दै अध्यादेश नै ल्याएको थियो।

त्यस्तै जेठ २ गते सर्वोच्चले सजाय सदर गर्नुअघि सरकारले मुलुकी अपराध संहिताको संशोधनका लागि विधेयक संसदमा दर्ता गरेको थियो।