इन्डियन प्रिमियर लिग : राजस्थानले पन्जाबलाई ४ विकेटले हरायो

काठमाडौं,६ जेठ । इन्डियन प्रिमियर लिग (आईपीएल) क्रिकेटमा राजस्थान रोयल्सले पन्जाब किंग्सलाई ४ विकेटले हराएको छ ।हिमाञ्चलको धर्मशाला क्रिकेट स्टेडियममा टस हारेर ब्याटिङको निम्तो पाएको पञ्जाबले निर्धारित २० ओभरमा ५ विकेट गुमाएर १ सय ८७ रन बनायो । उसका लागि अविजित रहेका साम करनले ४९ तथा शाहरुख खानले ४१ रन बनाए ।

यस्तै, जितेश शर्माले ४४, अर्थव ताडेले १९ र कप्तान शिखर धवनले १७ रन जोडे । राजस्थानका लागि नवदीप सैनीले ३, ट्रेन्ट बोल्ट र एडम जाम्पाले १/१ विकेट हात पारे ।

पञ्जाबले दिएको १ सय ८८ रनको लक्ष्य राजस्थानले १९.४ ओभरमा ६ विकेट गुमाएर भेट्टायो । उसका लागि देवदत्त पाडिक्कल र यशस्वी जैसवालले अर्धशतकीय पारी खेले । ३० बलको सामना गरेका पाडिक्कलले ५ चौका र ३ छक्काको सहयोगमा ५१ रन बनाए । यस्तै, जैसवालले ३६ बलमा ८ चौकासहित ५० रनको इनिङ खेले ।

शिमरोन हेटमायरले ४६, रियान परागले २० र ध्रुव जुरेलले अविजित १० रन जोडे । पञ्जाबका लागि कागिसो रबाडाले २, राहुल चाहर, नाथन एलिस, अर्शदीप सिंह र साम करनले १/१ विकेट लिए ।