रवि लामिछानेका चालक शम्भुको उपचारको क्रममा निधन

काठमाडौं,१९ वैशाख । राष्ट्रिय स्वतन्त्र पार्टीका सभापति रवि लामिछानेका चालक दिलबहादुर थापा ‘शम्भु’ को उपचारको क्रममा मृत्यु भएको छ ।

छतबाट खसेर गम्भीर घाइते भएका सभापति रवि लामिछानेका चालक शम्भु थापाको काठमाडौंको मेडिसिटी अस्पतालमा उपचारको क्रममा मंगलबार निधन भएको  काठमाडौंको मेडिसिटी अस्पताल स्रोतले जानकारी दिएको छ।

अस्पताल स्रोतका अनुसार  दिउँसो २ बजेतिर उनको मृत्यु भएको हो । आफन्तले उनको शव अस्पतालबाट लिएर गइसकेका छन्।

सुरूमा भरतपुरमै उपचार गरेपछि थापालाई हेलिकप्टरबाट काठमाडौं ल्याएर मेडिसिटीमा उपचार थालिएको थियो।सुरूदेखि भेन्टिलेटरमा राखेर उनको उपचार भएको थियो।

वैशाख ४ गते उपनिर्वाचनका लागि चितवन गएका बेला भरतपुरस्थित सभापति लामिछानेको घरको छतबाट खसेर थापा गम्भीर घाइते भएका थिए। उनलाई कलेज अफ मेडिकल साइन्सेस भरतपुरमा उपचार गराइए पनि थप उपचारका लागि बैशाख ५ गते सेनाको हेलिकोप्टरबाट काठमाडौं ल्याइएको थियो।