थप ५५ जनामा कोरोना पुष्टि

काठमाडौं,१९ वैशाख । पछिल्लो २४ घण्टामा देशभर थप ५५ जनामा कोरोना भाइरस संक्रमण पुष्टि भएको छ । १ हजार ७१८ नमुना परीक्षण गर्दा ५५ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार १८० जनाको पीसीआर परीक्षणबाट २२ तथा १ हजार ५३८ जनाको एन्टिजेन परीक्षणबाट ३३ गरी जम्मा ५५ जना संक्रमित थपिएका हुन् । योसँगै हाल देशभर २५२ सक्रिय संक्रमित रहेका छन् भने पछिल्लो २४ घण्टामा ५३ जना कोरोना संक्रमणमुक्त भएका छन् ।

यस्तै हाल संस्थागत आईसोलेसनमा २५ जना, आईसीयूमा ११ जना र एकजना संक्रमितको भेन्टिलेटरमा राखेर उपचार भइरहेको मन्त्रालयले जनाएको छ ।