इन्डियन प्रिमियर लिग : लगातार पाँच हारपछि दिल्लीको पहिलो जित

काठमाडौँ,८ वैशाख । इन्डियन प्रिमियर लिग (आईपीएल) क्रिकेटमा दिल्ली क्यापिटल्सले पहिलो जित निकालेको छ । बिहीवार राति भएको खेलमा कोलकाता नाइट राइडर्सलाई ४ विकेटले हराउँदै दिल्ली क्यापिटलले जित निकालेको हो ।

दिल्लीको घरेलु मैदान अरुण जेट्लीमा टस हारेर पहिला ब्याटिङ गरेको कोलकाताले २० ओभरमा १ सय २७ रन बनाएको थियो । उसका जेसन रोयले ४३ तथा आन्द्रे रसेलले अविजित ३८ रन बनाउनुबाहेक अरुले राम्रो प्रदर्शन गर्न सकेनन् । दिल्लीका एनरिच नोर्किया, अक्षर पटेल, कुलदीप यादव र इशान्त शर्माले समान २/२ तथा मुकेश कुमारले १ विकेट लिए ।

जवाफी ब्याटिङ गरेको दिल्लीले १९.२ ओभरमा ६ विकेट गुमाएर लक्ष्य भेट्टायो ।उसका डेविड वार्नरले ५७ रनको अर्धशतकिय पारी खेले । कोलकाताका वरुण चक्रवर्ती, अनुकूल रोय र नितिश राणाले समान २/२ विकेट लिए ।