इण्डियन प्रिमियर लिग : हैदराबादले कोलकातालाई हरायो

काठमाडौं,२ वैशाख । इण्डियन प्रिमियर लिग (आईपीएल) क्रिकेट अन्तर्गत सनराइजर्स हैदराबादले कोलकाता नाइट राइडर्सलाई  पराजित गरेको छ। इडेन गार्डेन कोलकोतामा शुक्रवार राति भएको खेलमा सनराइजर्स हैदराबादले कोलकाता नाइट राइडर्सलाई २३ रनले पराजित गरेको हो ।

टस हारेर पहिले ब्याटिङ गरेको हैदराबादले २० ओभरमा ४ विकेट गुमाएर २२८ रन बनाएको थियो। उसका लागि ओपनर ह्यारी ब्रूकले ५५ बलमा १२ चौका तथा तीन छक्काको मद्दतले अविजित एक सय रन बनाएपछि टीमले उच्च योगफल तयार पार्न सफल भएको थियो ।यस्तै,  एडेन मार्करमले ५०, अभिषेक शर्माले ३२ तथा हेन्रिच क्लासेनले १६ रन  बनाएका थिए ।कोलकाताका लागि आन्द्रे रसेलले तीन र वरुण चक्रवर्तीले एक विकेट लिए ।

जवाफि व्यटिङ गरेको कोलकाताले निर्धारित २० ओभरमा ७ विकेट गुमाएर २ सय ७ रन बनायो ।उसका लागि कप्तान नितिश राणा र रिंकु सिंहले अर्धशतकीय पारी खेले पनि टोलीलाई जित दिलाउन सकेनन् ।

४१ बलको सामना गरेका राणाले ६ छक्का र ५ चौकाको मद्दतमा ७५ रन बनाए । लगातार दोस्रो अर्धशतक बनाउनेक्रममा रिंकुले ३१ बलमा तीन छक्का र तीन चौकाको सहयोगमा अविजित ५८ रनको पारी खेले । नारायण जगदीशनले ३६, वैंकटेश अय्यर र शार्दुल ठाकुरले १२/१२ रन जोडे । हैदराबादका लागि मयंक मार्कन्डे, मार्को जेनसनले दुई/दुई, टी नटराजन, भुवनेश्वर कुमार र उमरान मलिकले एक/एक विकेट हात पारे ।

यो जितसँगै हैदराबाद अंक तालिकाको सातौँ स्थानमा उक्लिएको छ । उसले चार म्याच खेल्दा दुईमा जित र दुई खेलमा हारको सामना गरेको छ । कोलकाताले पनि चार खेलमा दुईमा हार तथा दुई खेलमा जित हात पार्दै अंक तालिकाको चौथो स्थानमा छ ।

आईपीएलमा आज शनिवार २ खेल हुदैछ । दिउँसो ३ः४५ बजे रोयल च्यालेञ्जर्स बेंग्लोर तथा दिल्ली क्यापिटल्सबीच प्रतिस्पर्धा हुनेछ भने राति ७ः४५ बजे लनखउ तथा पञ्जाबबीच प्रतिस्पर्धा हुनेछ ।