चितवनमा एकैेदिन दुई गैंडा मृत फेला

चितवन,२९ चैत । चितवन राष्ट्रिय निकुञ्जका दुई वटा एकसिंगे गैँडा मृतावस्थामा फेला परेका छन् । चैत २७ गते सोमबार चितवन राष्ट्रिय निकुञ्जको अमलटारी सेक्टर अन्तर्गत मर्दी घोल स्थित निकुञ्जको कोर क्षेत्रमा पर्ने नारायणी नदिको भङ्गालो क्षेत्र र निकुञ्जको बगइ माडी सेक्टर अन्तर्गत रिउ खोलाको दक्षिण किनारको मध्यवर्ती क्षेत्रमा पर्ने काँस घारी क्षेत्रमा गरि दुई वटा गैंडा मृत फेला परेको निकुञ्जका सूचना अधिकारी गणेशप्रसाद तिवारीले जानकारी दिए ।

अमलटारी सेक्टर अन्तर्गत मर्दी घोलमा मृतावस्थामा फेला परेको पोथी गैँडाको उमेर अन्दाजी ७ महिनाको उक्त गैँडाको खाग नपलाएको र भाले गैँडाको आक्रमणका कारण मृत्यु भएको हुनसक्ने चितवन राष्ट्रिय निकुञ्ज प्रशासनले जनाएको छ ।

यसैगरी निकुञ्जकै माडी सेक्टर अन्तर्गत रिउ खोलाको दक्षिण किनारको मध्यवर्ती क्षेत्रमा मृतावस्थामा फेला परेको भाले गैँडाको उमेर सानै रहेको र उक्त गैँडाको पनि खाग नपलाएको र बाघको आक्रमणबाट मृत्यु भएको निकुञ्ज प्रशासनले जनाएको छ ।