इन्डियन प्रिमियर लिग : राजस्थान र आरसिबीको विजय सुरुवात

काठमाडौँ,२० चैत । इन्डियन प्रिमियर लिग (आईपीएल) मा सनराइजर्स हैदराबादलाई हराउँदै राजस्थान रोयल्सले शानदार सुरुवात गरेको छ । आइतबार भएको पहिलो खेलमा गत सिजनको उपविजेता राजस्थान ७२ रनले विजयी भएको हो ।

टस हारेर पहिले ब्याटिङ गरेको राजस्थानले तीन खेलाडीको अर्धशतकको मद्दतले ५ विकेटको क्षतिमा २०३ रन बनायो । कप्तान सञ्जु स्याम्सनले ५५ तथा जस बट्लर र यसस्वी जैसवालले ५४–५४ रन बनाए । हैदराबादका लागि फजहल हक फारुकी र टी नटराजनले २–२ विकेट लिए ।

जवाफी ब्याटिङमा उत्रेको हैदराबादको सुरुवात निकै खराब रह्यो । बिना कुनै रन बनाउँदा टोलीले दुई विकेट गुमाएको थियो । अन्ततः टोलीले निर्धारित २० ओभरमा ८ विकेटको क्षतिमा १३१ रन मात्र बनाउन सक्यो । हैदराबादका लागि अब्दुल सामदले ३२ तथा मंयक अग्रवालले २७ रन बनाए । राजस्थानका लागि युजभेन्द्र चाहलले ४ तथा ट्रेन्ट बोल्टले २ विकेट लिए ।

यस्तै हिजो रातीनै सम्पन्न दोस्रो खेलमा रोयल च्यालेन्जर्स बेंगलोर (आरसिबी) ले पाँच पटकको च्याम्पियन मुम्बई इन्डियन्सलाई ८ विकेटले पराजित गरेको छ।

रोयल च्यालेन्जर्स बेंगलोर (आरसिबी) ले सानदार सुरुवात गरेको छ। बेंगलोरको घरेलु मैदानमा भएको खेलमा बेंगलोरका कप्तान फाफ डुप्लेसीस र विराट कोहलीले सानदार साझेदारी गरेपछि आरसिबीले मुम्बईले दिएको १७२ रनको लक्ष्य २२ बल बाँकी हुँदै २ विकेट गुमाएर पुरा गरेको थियो।

टस हारेर पहिले ब्याटिङ गरेको मुम्बईले खराब सुरुवातका बाबजुत तिलक बर्माको ८४ रनको विष्फोटक इनिङमा निर्धारित २० ओभरमा ७ विकेट गुमाएर १७१ रनको प्रतिस्पर्धात्मक स्कोर तयार गरेको थियो।

जवाफमा आरसिबीले सानदार सुरुवात गर्यो। डुप्लेसीस र कोहलीले पहिलो विकेटका लागि १४८ रनको साझेदारी गरेका थिए। डुप्लेसीस ४३ बलमा ७३ रनमा आउट हुँदा कोहली ४९ बल खेल्दै ८२ रनमा अविजित रहे। त्यस्तै ग्लेन म्याक्सवेल ३ बलमा १२ रन बनाएर अविजित फर्किएका थिए।