इन्डियन प्रिमियर लिग : लखनउको विजयी सुरुआत

इन्डियन प्रिमियर लिग(आइपिएल) मा दोस्रो दिनको दोस्रो खेलमा लखनउ सुपर जायन्ट्सले जितेकाे छ । शनिबार राति घरेलु मैदानमा भएको खेलमा लखनउले दिल्ली क्यापिटल्सलाई ५० रनले पराजित गरेको हो ।

लखनउको घरेलु मैदानमा भएको खेलमा लखनउले दिएको १९४ रनको लक्ष्य पछ्याएको दिल्लीले २० ओभरमा ९ विकेट गुमाएर १४३ रन मात्र बनायो । दिल्लीका लागि कप्तान डेविड वार्नरले ४८ बलमा ७ चौका प्रहार गर्दै सर्वाधिक ५६ रन बनाए भने राईली रुसोले ३० रन जोडे ।

लखनउका मार्क उडले ५ तथा आवेस खान र रवि बिष्नोईले २/२ विकेट लिए। टस हारेर पहिले ब्याटिङ गरेको लखनउले २० ओभरमा ६ विकेट गुमाएर १ सय ९३ रन बनाएको थियो। लखनउका लागि ओपनर कायल मेयर्सले ३८ बलमा २ चौका र ७ छक्काको मद्दतमा सर्वाधिक ७३ रन बनाए ।

निकोलस पुरनले २१ बलमा २ चौका र ३ छक्काको सहयोगमा ३६ रन जोडे । आयुष बदोनीले ७ बलमा १८ रन बनाए ।दिल्लीका लागि खलिल अहमद र चेतन साकरियाले दुई/दुई तथा अक्षर पटेल र कुलदिप यादवले समान एक/एक विकेट लिए ।