इण्डियन प्रिमियर लिग : पञ्जाब किंग्सको विजयी सुरुवात

काठमाडौं,१८ चैत । इण्डियन प्रिमियर लिग (आइपिएल)अन्तर्गत पञ्जाब किंग्सले विजयी सुरुवात गरेको छ । शनिबार सम्पन्न खेलमा पञ्जाबले कोलकोता नाइट राइडर्सलाई डक वर्थ लुइस नियम अनुसार ७ रनले पराजित गरेको हो ।

मोहालीमा टस हारेपछि पहिले ब्याटिङ गरेको पन्जाबले निर्धारित २० ओभरमा पाँच विकेट गुमाएर १९१ रन बनाएको थियो । जवाफमा कोलकाताले १६ ओभरमा सात विकेट गुमाएर १४६ रन बनाउँदा वर्षा भयो । त्यसपछि खेल सञ्चालन हुन सकेन र पन्जाबले सात रनको रोमाञ्चक जित दर्ता गर्‍यो ।

पञ्जाबका लागि भानुका राजपक्षेले ५० रन बनाए भने कप्तान शिखर धवनले ४०, साम करणले अविजित २६ रन बनाएका थिए । त्यस्तै, ओपनर प्रभिसिमरन सिंहले २३, जितेस शर्माले २१, सिकन्दर राजाले १६ रन र शाहरुख खानले अविजित ११ रन बनाए । कोलकाताका टिम साउदीले दुई विकेट लिए । उमेश यादव, सुनील नारिन र वरुन चक्रवर्तीले समान एक विकेट लिए ।

१९२ रनको लक्ष्य पछ्याउने क्रममा कोलकाताका आन्द्रे रसेलले ३५ रन बनाए । भेन्कटेस ऐयरले ३४, कप्तान नितिश रानाले २४ र रहमनुल्लाह गुर्बजले २२ रनको योगदान गरे ।पन्जाबका अर्शदीप सिंहले तीन विकेट लिए । साम करन, नाथन एलिस, सिकन्दर राजा र राहुल चहरले समान एक विकेट लिए ।