मकवानपुरमा मोटरसाइकलको ठक्करबाट एक जनाको मृत्यु

हेटौंडा,१५ चैत । मकवानपुरमा मोटरसाइकलको ठक्करबाट एक जनाको मृत्यु भएको छ। बागमती गाउँपालिका-८ खजुरीदमार निवासी ५० बर्षीय दिलबहादुर स्याङतानको मृत्यु भएको हो। आज बिहान बागमती गाउँपालिका–८, साततले राजबास पुलस्थित हेटौंडा–फापरबारी सडकखण्डमा फापरबारीबाट हेटौंडातर्फ आउँदै गरेको बा २५ प १९०८ नम्बरको मोटरसाइकलले ठक्कर दिँदा स्याङ्तान गम्भीर घाइते भएका थिए।

उनलाई उपचारको लागि हेटौंडा अस्पताल ल्याइएको र उपचारको क्रममा मृत्यु भएको जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीले जानकारी दिए।

ठक्कर दिने मोटरसाइकल प्रहरीको नियन्त्रणमा रहेको छ भने चालक फरार रहेका छन् । चालकको खोजी कार्य भइरहेको प्रहरीले जनाएको छ।