एसईईको सम्पूर्ण तयारी पुरा,सबैभन्दा बढी परीक्षा केन्द्र बाग्मतीमा

काठमाडौँ,१५ चैत । शुक्रबारदेखि सुरु हुने माध्यमिक शिक्षा परीक्षा एसईईको सबै तयारी पूरा भएको राष्ट्रिय परीक्षा बोर्डले जनाएको छ । यस वर्षको परीक्षामा ५ लाख १६ हजार ५९१ परीक्षार्थी सहभागी हुन लागेका छन् ।

परीक्षा नियन्त्रक विष्णुनारायण श्रेष्ठका अनुसार २ लाख ६० हजार ६७४ छात्र र २ लाख ५५ हजार ९१७ छात्राले एसईई परीक्षा दिँदैछन् । परीक्षाका लागि आवश्यक उत्तरपुस्तिका सबै परीक्षा केन्द्रमा र प्रश्नपत्र सुरक्षा केन्द्रहरुमा पठाइसकिएको छ ।

यस वर्ष विदेशबाट पनि परीक्षार्थीहरु परीक्षमा सहभागी हुनेछन् । बोर्डको अनुसार वैदेशिक रोजगारीमा रहेका नेपालीका छोराछोरीहरु ४० जनाले जापानबाटै परीक्षा दिन लागेका हुन् । बालबालिकाहरुले जापान सरकारको अनुमति लिएर नेपाली पाठ्यक्रम पढिरहेका छन् ।

७७ जिल्लामा २ हजार ३६ परीक्षा केन्द्र निर्धारण गरिएको छ भने सबैभन्दा बढी परीक्षा केन्द्र बागमती प्रदेशमा छन् । बागमती प्रदेशमा १ लाख ६ हजार ९५९ परीक्षार्थीका लागि ४३४ परीक्षा केन्द्र तोकिएको छ । सबैभन्दा कम परीक्षार्थी र परीक्षा केन्द्र कर्णाली प्रदेशमा छन् । कर्णालीमा ४१ हजार ३२९ परीक्षार्थी र १७९ परीक्षा केन्द्र छन् ।