भरतपुर विमानस्थलमा आधुनिक टर्मिनल भवन निर्माण हुने

चितवन,११ चैत । चितवनको भरतपुर विमानस्थलमा सुविधा सम्पन्न आधुनिक टर्मिनल भवन निमार्ण हुने भएको छ ।

नेपाल नागरिक उड्डयन प्राधिकरणले टर्मिलन भवन पुरानो भइसकेको र यात्रुको चापु थेग्न नसक्ने भएपछि नयाँ टर्मिलन भवन निर्माण गर्न लागेको हो। २२ वर्ष अगाडि बनेको टर्मिनल भवन पुरानो भइसकेको छ।

टर्मिनल भवन निर्माणका लागि प्राधिकरणले सोमबार मात्रै निर्माण कम्पनीसँग सम्झौता गरेको हो। प्राधिकरणले  करबाहेक १ अर्ब ७० करोड रुपैयाँमा भवन निर्माणका लागि सम्झौता गरेको हो। निर्माण कम्पनीले ३ वर्षभित्र भवन निर्माण गरिसक्नु पर्ने गरी सम्झौता गरेको हो।

निर्माणको जिम्मा केसी क्षमा देवी प्रतिष्ठा जेवीले पाएको छ। विमानस्थलमा सिवानी एयरको ह्याङगर रहेको ठाउँमा टर्मिनल भवन निर्माण हुने छ। ४ हजार ८ सय स्क्वायर मिटर क्षेत्रफलमा २ तले भवन निर्माण हुने छ। टर्मिनल भवनको कुल स्पेस भने ८ हजार स्क्वायर वर्ग मिटरभन्दा बढी हुने छ। भवनको शिलान्यास केही दिनभित्रै गर्ने तयारीसमेत भएको छ।