राष्ट्रपति पौडेलले पुरा गरे आफ्नो वाचा,बिना कारगेट कुमारी घर पुगे( भिडियो सहित)

काठमाडौं,४ चैत । राष्ट्रपति रामचन्द्र पौडेल सामान्य सवारीमै कुमारी घर पुग्नु भएको छ। राष्ट्रपति पौडेल कुमारी घर पुग्दा कुनै सवारीलाई रोकतोक थिएन।

वसन्तपुरको कुमारी घरमा पुग्दा पहिलेजस्तै कुनै तामझाम थिएन । अगुवा र पछुवा गाडी लिएर राष्ट्रपति पौडेल वसन्तपुर पुग्दा धेरै सर्वसाधारणले उहाँ आएको पत्तो समेत पाएनन् भने कतिपयले भने राष्ट्रपति पौडेल त्यसरी आएको भनेर पत्याउन सकिरहेका थिएनन् ।

कुमारी घरभित्र प्रवेश गर्नुअघि पनि पैदलयात्री र सर्वसाधारणको सवारीलाई आउजाउमा रोक लगाइएको थिएन। दिउँसो ४ बजे अघिपछि एक एकवटा गाडीसहित पौडेल कुमारी घर आइपुगनु भयो । कारगेटमा सुरक्षाकर्मीले प्रयोग गर्ने मोटरबाइकसमेत प्रयोग नगरी पौडेल बसन्तपुरस्थित कुमारी घर पुगेनु भएको हो।

यसअघि राष्ट्रपतिको सवारीमा सर्वसाधारणले धेरै दुःख पाउने गरेका थिए । राष्ट्रपतिका लागि सडक खाली गराउँदा जनताले लामो जामको सास्ती खेप्नु पर्थ्यो । त्यसैले पनि पौडेलले राष्ट्रपति हुनुअघि नै आफूले त्यो परम्परा तोड्ने वाचा गर्नु भएको थियो । आज उहाँले आफ्नो वाचा पूरा गरेर पनि देखाउनु भएको छ ।
पौडेल कुमारी पूजा गरी आधाघण्टामै शितल निवास फर्किनु भएको थियो ।  बिहान राष्ट्रपति पौडेललाई कुमारी घरको तर्फबाट पूजाको प्रसाद पुर्‍याइएको थियो।