स्ववियु निर्वाचनका लागि देशभरका क्याम्पसमा आज उम्मेदवारी दर्ता गरिँदै

काठमाडौं,२७ फागुन । त्रिभुवन विश्वविद्यालयअन्तर्गत स्वतन्त्र विद्यार्थी युनियन(स्ववियु)निर्वाचनका लागि आज शनिबार देशभरका आङ्गिक र सामुदायिक क्याम्पसमा उम्मेदवारी दर्ता हुँदै छ ।

आगामी चैत ५ गते देशभर स्ववियु निर्वाचन हुँदैछ ।

स्ववियु निर्वाचनमा प्रमुख राजनीतिक दलहरू निकट विद्यार्थी संगठनहरू नेपाल विद्यार्थी संघ, अनेरास्ववियु र अखिल क्रान्तिकारीबीच मुख्य प्रतिस्पर्धा हुने देखिएको छ ।

समानुपातिक तर्फको नामावली दाखिला आजै गर्नुपर्ने निर्वाचन कार्यतालिका रहेको छ । त्रिभुवन विश्वविद्यालयले सार्वजनिक गरेको स्ववियु निर्वाचनको कार्यतालिकाअनुसार बिहान ११ देखि दिउँसो २ बजेसम्म समानुपातिक तथा प्रत्यक्षतर्फको उम्मेदवारी दर्ता गराउने कार्यक्रम छ ।त्यस्तै, आजै साँझ ५ बजे प्रत्यक्षतर्फको उम्मेदवारको नामावली प्रकाशित गर्ने कार्यक्रम छ । स्ववियु निर्वाचनको मतदान चैत ५ गते बिहान ८ देखि दिउँसो ४ बजेसम्म तोकिएको छ ।